МЦМС одржа две напредни обуки за процесите за креирање политики и подготовка на закони од 28 ноември до 1 декември 2012 година во Скопје и во Маврово. Вкупно 25 претставници на граѓански организации со искуство во креирањето политики и подготовка на закони, ги разменија своите досегашни искуства, пречките со кои се соочиле и успесите кои ги постигнале во конкретни ситуации.

Горан Форбици, директор на Словенечкиот центар за невладини организации (ЦНВОС), ги пренесе методите и практиките кои во Словенија се употребуваат во процесите на застапување и лобирање. Работата во групи беше фокусирана на пристапите на застапување и лобирање за донесување или за изменување и дополнување на конкретни прописи: Предлог на Закон за изменување и дополнување на Закон за здравствена заштита, Законот за донации и спонзорства во јавните дејности, Законот за бесплатна правна помош и др.

Од особена важност за учесниците беа искуствата за лобирање на ниво на Влада, бидејќи најмалку имале можност да го прават тоа, потоа, за навремени средби со сите политички партии кои конструктивно би ги подржале нивните иницијативи и би ги вклучиле во своите програми.

Прашањата кои произлегоа и се наметнаа се однесуваа на лобирањето во услови на постоење минимум политичка волја, т.е изнаоѓање алтернативни начини за лобирање, заеднички средби за споделување на искуства (од формален и неформален карактер) за прогресот во иницијативите или здружување за нови иницијативи.

Претставниците на ГО истакнаа дека искуствата од обуката ќе ги употребат при тековни или идни иницијативи, поактивно и организирано ќе делуваат и ќе го систематизираат процесот на лобирање, како и ќе посветат внимание на изнаоѓање начини на соработка со клучните луѓе во процесите на креирање политики и донесување закони.

Обуката е дел од проектот „Огледало на Владата: учество на јавноста во процесите на подготовка на закони” кој е поддржан од Европската Унија од инструментот за човекови права и демократијата (ЕИДХР). Целта на проектот е да се зголеми соработка на граѓанските организации со органите на државната управа во процесите на креирање политики и подготовка на закони. Проектот се спроведува во партнерство со ЦНВОС од Љубљана и Балканска мрежа за развој на граѓанското општество (БЦСДН).